ਇਹ ਹੁਕਮ 26 ਅਕਤੂਬਰ, 2018 ਤੋਂ ਲਾਗੂ ਹੋ ਚੁੱਕੇ ਹਨ ।

ਡਾ ਜਗਦੇਵ ਸਿੰਘ 

ਤਰਨ ਤਾਰਨ 29 ਅਕਤੂਬਰ: 

ਜ਼ਿਲ੍ਹਾ ਮੈਜਿਸਟਰੇਟ ਤਰਨ ਤਾਰਨ ਸ੍ਰੀ ਪਰਦੀਪ ਕੁਮਾਰ ਸੱਭਰਵਾਲ ਨੇ ਫੌਜਦਾਰੀ ਜਾਬਤਾ ਸੰਘਤਾ 1973 (1974 ਦਾ ਐਕਟ ਨੰਬਰ 2) ਦੀ ਧਾਰਾ ਅਧੀਨ ਪ੍ਰਾਪਤ ਹੋਏ ਅਧਿਕਾਰਾਂ ਦੀ ਵਰਤੋਂ ਕਰਦੇ ਹੋਏ ਜ਼ਿਲ੍ਹਾ ਤਰਨ ਤਾਰਨ ਦੀ ਹਦੂਦ ਅੰਦਰ, ਸੁਪਰੀਮ ਕੋਰਟ ਆਫ਼ ਇੰਡੀਆ ਵੱਲੋਂ ਆਵਾਜ਼ੀ ਅਤੇ ਵਾਤਾਵਰਣ ਪ੍ਰਦੂਸ਼ਣ ਨੂੰ ਰੋਕਣ ਸਬੰਧੀ ਅਤੇ ਲੋਕ ਹਿੱਤ ਵਿਚ ਜਾਰੀ ਦਿਸ਼ਾ ਨਿਰਦੇਸ਼ਾਂ ਦੀ ਪਾਲਣਾ ਵਿੱਚ ਕਿਸੇ ਵੱਲੋਂ ਵੀ ਆਤਿਸ਼ਬਾਜੀ, ਜਿਸ ਨੂੰ ਚਲਾਏ ਜਾਣ ‘ਤੇ, ਚੱਲਣ ਵਾਲੇ ਸਥਾਨ ਤੋਂ ਚਾਰ ਮੀਟਰ ਦੇ ਦਾਇਰੇ ਅੰਦਰ 125 ਡੀ. ਬੀ. ਤੋਂ ਵੱਧ ਆਵਾਜ਼ ਧਮਕ ਪੈਂਦਾ ਹੁੰਦੀ ਹੋਵੇ ਅਤੇ ਜ਼ਿਆਦਾ ਧੂੰਆਂ ਛੱਡਣ ‘ਤੇ ਵਾਤਾਵਰਣ ਵਿਚ ਪ੍ਰਦੂਸ਼ਣ ਫੈਲਾਉਣ ਵਾਲੀ ਆਤਿਸ਼ਬਾਜੀ ਦੇ ਬਣਾਉਣ, ਵੇਚਣ ਅਤੇ ਸਟੋਰ ਕਰਨ ‘ਤੇ ਮੁਕੰਮਲ ਪਾਬੰਦੀ ਲਗਾਈ ਹੈ।

 ਇਸ ਤੋਂ ਇਲਾਵਾ ਪਾਬੰਦੀਸ਼ੁਦਾ ਧਮਾਕਾ ਖੋਜ ਸਮੱਗਰੀ ਬਣਾਉਣ, ਵੇਚਣ ਅਤੇ ਇਸ ਪਾਬੰਦੀ ਸ਼ੁਦਾ ਧਮਾਕੇਖੇਜ ਸਮੱਗਰੀ ਦੇ ਆਤਿਸ਼ਬਾਜੀ ਵਿੱਚ ਵਰਤਣ ‘ਤੇ ਵੀ ਮੁਕੰਮਲ ਪਾਬੰਦੀ ਹੋਵੇਗੀ । ਇਹ ਪਾਬੰਦੀ ਨਿਰਧਾਰਿਤ ਆਵਾਜ਼ ਅਤੇ ਰੰਗ-ਰੋਸ਼ਨੀ ਪੈਦਾ ਕਰਨ ਵਾਲੀ ਆਤਿਸ਼ਬਾਜੀ ‘ਤੇ ਲਾਗੂ ਨਹੀਂ ਹੋਵੇਗੀ।

ਐਕਸਪਲੋਸਿਵ ਐਕਟ 1984, ਐਕਸਪਲੋਸਿਵ ਰੂਲਜ਼ 2008 ਅਤੇ ਇਹਨਾਂ ਰੂਲਾਂ ਨਾਲ ਸਬੰਧਿਤ ਸਰਕਾਰ ਵੱਲੋਂ ਸਮੇਂ-ਸਮੇਂ ‘ਤੇ ਜਾਰੀ ਹਦਾਇਤਾਂ ਤਹਿਤ ਆਤਿਸ਼ਬਾਜੀ ਦੇ ਥੋਕ ਅਤੇ ਰਿਟੇਲਰ ਦੁਕਾਨਦਾਰ, ਜ਼ਿਲ੍ਹਾ ਮੈਜਿਸਟਰੇਟ ਦੇ ਦਫ਼ਤਰ ਵਿੱਚ ਦਰਖਾਸਤ ਪੇਸ਼ ਕਰਕੇ ਆਤਿਸ਼ਬਾਜੀ ਸਟੋਰ ਕਰਨ ਅਤੇ ਵੇਚਣ ਸਬੰਧੀ ਲੋਂੜੀਦੀ ਲਾਇਸੰਸ ਪ੍ਰਾਪਤ ਕਰਨਗੇ ਅਤੇ ਉਕਤ ਐਕਸਪਲੋਸਿਵ ਐਕਟ ਅਤੇ ਐਕਸਪਲੋਸਿਵ ਰੂਲਜ਼ ਦੀ ਸਖਤੀ ਨਾਲ ਪਾਲਣਾ ਕੀਤੀ ਜਾਵੇ ।

ਲਾਇਸੰਸ ਪ੍ਰਾਪਤ ਕਰਨ ਦੇ ਬਾਵਜੂਦ ਕਿਸੇ ਵੀ ਦੁਕਾਨਦਾਰ ਵੱਲੋਂ ਮਨਜ਼ੂਰਸ਼ੁਦਾ ਆਤਿਸ਼ਬਾਜੀ ਸੁਰੱਖਿਆ ਅਤੇ ਆਵਾਜਾਈ ਦੇ ਮੱਦੇਨਜ਼ਰ, ਦੁਕਾਨਾਂ ਤੋਂ ਬਾਹਰ ਸੜਕ ‘ਤੇ ਰੱਖ ਕੇ, ਗਲੀਆਂ, ਬਜ਼ਾਰਾਂ ਵਿਚ ਨਹੀਂ ਵੇਚੀ ਜਾਵੇਗੀ, ਬਲਕਿ ਪ੍ਰਸ਼ਾਸਨ ਵੱਲੋਂ ਨਿਰਧਾਰਿਤ ਕੀਤੇ ਖੁੱਲੇ ਸਥਾਨਾਂ ਗਰਾਊਂਡਾਂ ਤੇ ਆਤਿਸ਼ਬਾਜੀ ਵੇਚੀ ਸਕੇਗੀ । 

ਉਹਨਾਂ ਦੱਸਿਆ ਕਿ ਸਬ ਡਵੀਜ਼ਨ ਤਰਨ ਤਾਰਨ ਵਿੱਚ ਦੁਸ਼ਹਿਰਾ ਗਰਾਊਂਡ (ਗਾਂਧੀ ਗਰਾਊਂਡ), ਤਰਨ ਤਾਰਨ ਅਤੇ ਖੇਡ ਸਟੇਡੀਅਮ ਸ੍ਰੀ ਗੁਰੂ ਅਰਜਨ ਦੇਵ ਖਾਲਸਾ ਕਾਲਜ, ਚੋਹਲਾ ਸਾਹਿਬ, ਸਬ ਡਵੀਜ਼ਨ ਪੱਟੀ ਵਿੱਚ, ਦੁਸ਼ਹਿਰਾ ਗਰਾਊਂਡ ਪੱਟੀ, ਸਬ ਡਵੀਜ਼ਨ ਭਿੱਖੀਵਿੰਡ ਵਿੱਚ ਖੇਡ ਸਟੇਡੀਅਮ ਪੱਟੀ ਰੋਡ ਭਿੱਖਵਿੰਡ, ਸਰਕਾਰੀ ਹਾਈ ਸਕੂਲ ਦੇ ਸਾਹਮਣੇ ਗਰਾਊਂਡ ਕਸਬਾ ਖੇਮਕਰਨ ਅਤੇ ਸਬ ਡਵੀਜ਼ਨ ਖਡੂਰ ਸਾਹਿਬ ਵਿੱਚ ਸ੍ਰੀ ਗੁਰੂ ਅੰਗਦ ਦੇਵ ਸਟੇਡੀਅਮ ਖਡੂਰ ਸਾਹਿਬ ਦੇ ਨਿਰਧਾਰਿਤ ਸਥਾਨਾਂ ‘ਤੇ ਆਤਿਸ਼ਬਾਜੀ ਵੇਚੀ ਜਾ ਸਕੇਗੀ ।

ਉਹਨਾਂ ਦੱਸਿਆ ਕਿ ਆਤਿਸ਼ਬਾਜੀ ਵੇਚਣ ਲਈ ਟੈਂਪਰੇਰੀ ਸਟਰੱਕਚਰ (ਦੁਕਾਨਾਂ) ਆਤਿਸ਼ਬਾਜੀ ਵਿਕੇਰਤਵਾਂ ਵੱਲੋਂ ਆਪਣੇ ਪੱਧਰ ‘ਤੇ ਲੋਹੇ ਦੀਆਂ ਚਾਦਰਾਂ ਦੀ ਵਰਤੋਂ ਕਰਕੇ ਤਿਆਰ ਕੀਤਾ ਜਾਵੇਗਾ । ਇਸ ਟੈਂਪਰੇਰੀ ਸਟਰੱਕਚਰ ਵਿਚ ਲੱਗਣ ਵਾਲੇ ਮਟੀਰੀਅਲ ਜਿਵੇਂ ਕਿਸੇ ਵੀ ਤਰ੍ਹਾਂ ਦੇ ਕੱਪੜੇ ਦੇ ਟੈਂਟ, ਲੱਕੜੀ ਤੋਂ ਬਣੇ ਮਟੀਰੀਅਲ ਦੀ ਵਰਤੋਂ ਨਹੀਂ ਕੀਤੀ ਜਾਵੇਗੀ।ਕਿਸੇ ਵੀ ਦੁਕਾਨਦਾਰ ਵੱਲੋਂ ਆਤਿਸ਼ਬਾਜੀ ਜਾਂ ਹੋਰ ਕੋਈ ਵੀ ਸਮਾਨ ਦੁਕਾਨਾਂ ਤੋਂ ਬਾਹਰ ਸੜਕ ‘ਤੇ ਰੱਖਕੇ ਵੇਚਣ ‘ਤੇ ਮੁਕੰਮਲ ਪਾਬੰਦੀ ਹੋਵੇਗੀ, ਤਾਂ ਜੋ ਆਵਾਜਾਈ ਵਿਚ ਕਿਸੇ ਕਿਸਮ ਦਾ ਵਿਘਨ ਨਾ ਪਵੇ । 

ਥੋਕ ਅਤੇ ਰਿਟੇਲਟ ਆਤਿਸ਼ਬਾਜੀ ਵਿਕੇਰਤਾਵਾਂ ਵੱਲੋਂ ਆਤਿਸ਼ਬਾਜੀ ਦਾ ਡੰਪ ਰਿਹਾਇਸ਼ੀ ਇਲਾਕਿਆਂ ਤੋਂ ਦੂਰ ਖੁੱਲੇ ਸਥਾਨ ‘ਤੇ ਸਥਿਤ ਗੁਦਾਮ ਵਿਚ ਹੀ ਰੱਖਿਆ ਜਾਵੇਗਾ।ਸਬੰਧਿਤ ਦੁਕਾਨਦਾਰਾਂ ਵੱਲੋਂ ਡੰਪ ਸਟੋਰੇਜ਼ ਵਾਲੇ ਸਥਾਨਾਂ, ਆਤਿਸ਼ਬਾਜੀ ਦੀਆਂ ਦੁਕਾਨਾਂ ਵਿਚ ਪਾਣੀ, ਰੇਤਾ ਅਤੇ ਬਝਾਊ ਯੰਤਰਾਂ ਆਦਿ ਦਾ ਪ੍ਰਬੰਧ ਆਪਣੇ ਪੱਧਰ ‘ਤੇ ਰੱਖਿਆ ਜਾਵੇਗਾ।ਇਸ ਸਟੋਰੇਜ਼ ਲਈ ਵੀ ਜ਼ਿਲ੍ਹਾ ਮੈਜਿਸਟਰੇਟ ਅਤੇ ਐਕਸਪਲੋਸਿਵ ਵਿਭਾਗ ਦਾ ਲਾਇਸੰਸ ਜ਼ਰੂਰੀ ਹੈ । 

ਸੁਪਰੀਮ ਕੋਰਟ ਆਫ਼ ਇੰਡੀਆ ਦੇ ਹੁਕਮ ਮਿਤੀ 23-10-2018 ਅਨੁਸਾਰ 7 ਨਵੰਬਰ 2018 ਨੂੰ ਦੀਵਾਲੀ ਵਾਲੇ ਦਿਨ ਅਤੇ 23 ਤੇ 24 ਨਵੰਬਰ 2018 ਨੂੰ ਗੁਰਪੁਰਬ ਵਾਲੇ ਦਿਨ ਸ਼ਾਮ ਨੂੰ 8 ਵਜੇ ਤੋਂ ਰਾਤ 10 ਵਜੇ ਤੱਕ, ਕਿ੍ਰਸਮਿਸ ਵਾਲੇ ਦਿਨ 25 ਦਸੰਬਰ 2018 ਅਤੇ ਨਵੇਂ ਸਾਲ 31 ਦਸੰਬਰ 2018 ਦੀ ਰਾਤ ਨੂੰ 11:55 ਵਜੇ ਤੋਂ ਸਵੇਰੇ 12:30 ਤੱਕ ਹੀ ਆਤਿਸ਼ਬਾਜ਼ੀ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ। ਇਸੇ ਸਮੇਂ ਤੋਂ ਪਹਿਲਾਂ ਅਤੇ ਬਾਅਦ ਵਿਚ ਆਤਿਸ਼ਾਬਾਜੀ ਚਲਾਉਣ/ਵਰਤੋਂ ਕਰਨ ‘ਤੇ ਮੁਕੰਮਲ ਪਾਬੰਦੀ ਲਗਾਈ ਹੈ। ਇਸ ਤੋਂ ਇਲਾਵਾ ਸਾਈਲੈਂਸ ਜ਼ੋਨ ਜਿਵਂੇ ਕਿ ਸਰਕਾਰੀ ਦਫ਼ਤਰਾਂ, ਜੰਗਲਾਤ, ਹਸਪਤਾਲਾਂ, ਵਿੱਦਿਅਕ ਸੰਸਥਾਵਾਂ, ਅਦਾਲਤਾਂ, ਧਾਰਮਿਕ ਸੰਸਥਾਵਾਂ ਜਾਂ ਕੋਈ ਏਰੀਆ ਜਿਹੜਾ ਕਿ ਸਮੱਰਥ ਅਧਿਕਾਰੀ ਵੱਲੋਂ ਸਾਈਲੈਂਸ ਜ਼ੋਨ ਐਲਾਨਿਆ ਗਿਆ ਹੋਵੇ, ਦੇ 100 ਮੀਟਰ ਦੇ ਘੇਰੇ ਵਿਚ ਆਤਿਸ਼ਬਾਜੀ/ਪਟਾਕਿਆਂ ਨੂੰ ਚਲਾਉਣ ‘ਤੇ ਮੁਕੰਮਲ ਪਾਬੰਦੀ ਲਗਾਈ ਹੈ ।

ਸਮੂਹ ਉਪ ਮੰਡਲ ਮੈਜਿਸਟਰੇਟ ਆਪਣੇ-ਆਪਣੇ ਉਪ ਮੰਡਲ ਵਿਚ ਅਮਨ ਤੇ ਕਾਨੂੰਨ ਦੀ ਸਥਿਤੀ ਬਣਾਈ ਰੱਖਣ ਲਈ ਓਵਰਆਲ ਇੰਚਾਰਜ ਹੋਣਗੇ ਅਤੇ ਸਮੂਹ ਤਹਿਸੀਲਦਾਰ, ਨਾਇਬ ਤਹਿਸੀਲਦਾਰ ਆਪਣੇ ਆਪਣੇ ਅਧਿਕਾਰ ਖੇਤਰਾਂ ਵਿਚ ਬਤੌਰ ਡਿਊਟ ਮੈਜਿਸਟਰੇਟ ਹੋਣਗੇ ।